სპორტი - ჯანმრთელი და ძლიერი ქვეყნის საფუძველი

                  სპორტი - ჯანმრთელი და ძლიერი ქვეყნის საფუძველი
  სპორტი საქართველოსთვის წარმოადგენს არა მხოლოდ კულტურული მემკვიდრეობისა და ეროვნული იდენტობის განუყოფელ ნაწილს, არამედ თანამედროვე საზოგადოებრივი განვითარების უმნიშვნელოვანეს ფაქტორს. ის სცილდება გართობისა და შეჯიბრების საზღვრებს და იქცევა ეროვნული თვითშეგნების, ჯანსაღი საზოგადოებისა და ეკონომიკური წინსვლის ძლიერ ბერკეტად.
    სპორტი სახელმწიფოს კულტურული და სოციალური განვითარების ერთ-ერთი უმნიშვნელოვანესი მიმართულებაა. იგი აერთიანებს ფიზიკურ, ინტელექტუალურ და სულიერ ფასეულობებს, რომლებიც მიმართულია ადამიანის ჯანმრთელობის, კეთილდღეობისა და პიროვნული ჰარმონიის უზრუნველყოფაზე. 
  სპორტის განვითარება ეროვნულ პრიორიტეტად ითვლება, რადგან ის ხელს უწყობს მოქალაქეობრივი პასუხისმგებლობის გაღრმავებას, ახალგაზრდობის გაჯანსაღებას და ქვეყნის საერთაშორისო იმიჯის განმტკიცებას.
  სპორტი ეროვნული განვითარების სტრატეგიის განუყოფელი ნაწილია, რომლის მიზანია ჯანმრთელი, განათლებული და მოქალაქეობრივად პასუხისმგებელი საზოგადოების ჩამოყალიბება. მისი წარმატებული განვითარება მოითხოვს სახელმწიფოს, ადგილობრივი თვითმმართვე-ლობების, კერძო სექტორისა და სამოქალაქო საზოგადოების კოორდი-ნირებულ და მიზანმიმართულ თანამშრომლობას, რადგან სპორტი სახელმწიფოს, საზოგადოებისა და თითოეული მოქალაქის საერთო ინტერესების ნაწილია.
 როგორც ორგანიზებული და წესებზე დაფუძნებული ფიზიკური ან ინტელექტუალური აქტივობა, სპორტი მოიცავს როგორც ინდივიდუ-ალურ, ისე გუნდურ ფორმებს და ემსახურება ადამიანის შესაძლებ-ლობების გამოვლენასა და სრულყოფას. ის წარმოადგენს არა მხოლოდ ფიზიკური მომზადების საშუალებას, არამედ სოციალურ და კულტუ-რულ პლატფორმას, რომელიც აძლიერებს მოქალაქეობრივ ცნობიერებას, ურთიერთპატივისცემასა და საზოგადოებრივ სოლიდარობას.
     საქართველოსთვის სპორტი ჩვენი წარსულის ხმაა, რომელიც საუკუნეების სიღრმიდან გვაკავშირებს ჩვენს ფესვებთან. ქართულ მიწაზე დაბადებულმა ტრადიციულმა სახეობებმა, როგორიცაა ქართული ჭიდაობა, ცხენოსნობა და მშვილდოსნობა, ჩამოაყალიბა ჩვენი ხასიათი -მტკიცე, ღირსებისმოყვარე და შეუპოვარი. 
    სპორტი გვახსენებს, რომ გამარჯვება მხოლოდ ფინიშის ხაზზე მიღწეული შედეგი არ არის, იგი არის გზის ღირსეულად გავლა, საკუთარი თავის დაძლევა და პატივისცემა მოწინააღმდეგისადმი.
     ჩვენი სახელოვანი სპორტსმენები ცოცხალი სიმბოლოები არიან იმისა, თუ როგორ შეუძლია ერთ ადამიანს მილიონობით ადამიანის გულში გააღვივოს ეროვნული სიამაყის გრძნობა.
   საერთაშორისო ასპარეზზე სპორტი საქართველოს სახეა და კულტურის ელჩი, რომელიც სიტყვების გარეშე ეუბნება მსოფლიოს: „ეს არის საქართველო - პატარა ქვეყანა, მაგრამ დიდი გულით“.
  სპორტი ჩვენთვის ერთდროულად მემკვიდრეობაცაა და მომავალიც, ბრძოლაც და შთაგონებაც, გამარჯვების სიხარულიც და ღირსეული დამარცხების გაკვეთილიც.